Joseph Kenny OP: Canticle, 1 Sam 2:1-10 (Hebrew)

1 Samuel 2:1-10

Wednesday Morning 2

עָלַץ לִבִּי בַּיהוָה	רָמָה קַרְנִי בַּיהוָה
רָחַב פִּי עַל־אוֹיְבַי	כִּי שָׂמַחְתִּי בִּישׁוּעָתֶךָ

אֵין־קָדוֹשׁ כַּיהוָה	כִּי אֵין בִּלְתֶּךָ	וְאֵין צוּר כֵּאלֹהֵינוּ
אַל־תַּרְבּוּ תְדַבְּרוּ גְּבֹהָה	גְבֹהָה יֵצֵא עָתָק מִפִּיכֶם
כִּי אֵל דֵּעוֹת יְהוָה	וְלֵא נִתְכְּנוּ עֲלִלוֹת

קֶשֶׁת גִּבֹּרִים חַתִּים	וְנִכְשָׁלִים אָזְרוּ חָיִל
שְׂבֵעִים בַּלֶּחֶם נִשְׂכָּרוּ	וּרְעֵבִים חָדֵלּוּ

עַד־עֲקָרָה יָלְדָה שִׁבְעָה	וְרַבַּת בָּנִים אֻמְלָלָה
יְהוָה מֵמִית וּמְחַיֶּה	מוֹרִיד שְׁאוֹל וַיָּעַל
יְהוָה מוֹרִישׁ וּמַעֲשִׁיר	מַשְׁפִּיל אַף־מְרוֹמֵם

מֵקִים מֵעָפָר דָּל	מֵאַשְׁפֹּת יָרִים אֶבְיוֹן
לְהוֹשִׁיב עִם־נְדִיבִים	וְכִסֵּא כָבוֹד יַנְחִלֵם

כִּי לַיהוָה מְצֻקֵי אֶרֶץ	וַיָּשֶׁת עֲלֵיהֶם תֵּבֵל
רַגְלֵי חֲסִידוֹ יִשְׁמֹר	וּרְשָׁעִים בַּחֹשֶׁךְ יִדָּמּוּ
כִּי־לֹא בְכֹחַ יִגְבַּר־אִישׁ	יְהוָה יֵחַתּוּ מְרִיבָיו

עֵלִי בַּשָּׁמַיִם יַרְעֵם	יְהוָה יָדִין אַפְסֵי־אָרֶץ
וְיִתֶּן־עֹז לְמַלְכּוֹ	וְיָרֵם קֶרֶן מְשִׁיחוֹ