Joseph Kenny OP: The Psalms, 27 (Hebrew)

Psalm 27

Wednesday Evening 1

יְהוָה אוֹרִי וְיִשְׁעִי	מִמִּי אִירָא
יְהוָה מָעוֹז־חַיַּי	מִמִּי אֶפְחָד

בִּקְרֹב עָלַי מְרֵעִים	לֶאֱכֹל אֶת־בְּשָׂרִי
צָרַי וְאֹיְבַי לִי	הֵמָּה כָשְׁלוּ וְנָפָלוּ

אִם־תַּחֲנֶה עָלַי מַחֲנֶה	לֹא־יִירָא לִבִּי
אִם־תָּקוּם עָלַי מִלְחָמָה	בְּזֹאת אֲנִי בוֹטֵחַ

אַחַת שָׁאַלְתִּי מֵאָת	יְהוָה אוֹתוֹה אֲבַקֵּשׁ
שִׁבְתִּי בְּבֵית־יְהוָה	כָּל־יְמֵי חַיַּי
לַחֲזוֹת בְּנֹעַם־יְהוָה	וּלְבַקֵּר בְּהֵיכָלוֹ

כִּי יִצְפְּנֵנִי בְּסֻכֹּה	בְּיוֹם רָעָה
יַסְתִּרֵנִי בְּסֵתֶר אָהֳלוֹ	בְּצוּר יְרוֹמְמֵנִי
וְעַתָּה יָרוּם רֹאשִׁי	עַל אֹיְבַי סְבִיבוֹתַי
וְאֶזְבְּחָה בְאָהֳלוֹ זִבְחֵי תְרוּעָה	אָשִׁירָה וַאֲזַמְּרָה לַיהוָה

שְׁמַע־יְהוָה קוֹלִי	אֶקְרָא	וְחָנֵּנִי וַעֲנֵנִי
לֵךְ אָמַר לִבִּי	בַּקְּשׁוּ פָנָי	אֶת־פָּנֶיךָ יְהוָה אֲבַקֵּשׁ
אַל־תַּסְתֵּר פָּנֶיךָ מִמֶּנִּי	אַל־תַּט־בְּאַף עַבְדֶּךָ	עֶזְרָתִי הָיִיתָ

אַל־תִּטְּשֵׁנִי וְאַל־תַּעַזְבֵנִי	אֱלֹהֵי יִשְׁעִי
כִּי־אָבִי וְאִמִּי עֲזָבוּנִי	וַיהוָה יַאַסְפֵנִי

הוֹרֵנִי יְהוָה דַּרְכֶּךָ	וּנְחֵנִי בְּאֹרַח מִישׁוֹר	לְמַעַן שׁוֹרְרָי
אַל־תִּתְּנֵנִי בְּנֶפֶשׁ צָרָי	כִּי קָמוּ־בִי עֵדֵי־שֶׁקֶר	וִיפֵחַ חָמָס

לְלֵא הֶאֱמַנְתִּי	לִרְאוֹת בְּטוּב־יְהוָה	בְּאֶרֶץ חַיִּים
קַוֵּה אֶל־יְהוָה	חֲזַק וְיַאֲמֵץ לִבֶּךָ	וְקַוֵּה אֶל־יְהוָה