Joseph Kenny OP: The Psalms, 31 (Hebrew)

Psalm 31

Monday Readings 2

בְּךָ יְהוָה חָסִיתִי

אַל־אֵבוֹשָׁה לְ־עוֹלָם

בְּצִדְקָתְךָ פַלְּטֵנִי

הַטֵּה אֵלַי אָזְנְךָ	מְהֵרָה הַצִּילֵנִי
הֱיֵה לִי לְ־צוּר מָעוֹז	לְ־בֵית מְצוּדוֹת לְ־הוֹשִׁיעֵנִי

כִּי־סַלְעִי וּמְצוּדָתִי אָתָּה	וּלְמַעַן שִׁמְךָ תַּנְחֵנִי וּתְנַהֲלֵנִי
תּוֹצִיאֵנִי מֵרֶשֶׁת	זוּ טָמְנוּ לִי	כִּי־אַתָּה מָעוּזִּי

בְּיָדְךָ אַפְקִיד רוּחִי

פָּדִיתָה אוֹתִי יְהוָה אֵל

אֱמֶת שָׂנֵאתִי	הַשֹּׁמְרִים הַבְלֵי־שָׁוְא
וַאֲנִי אֶל־יְהוָה בָּטָחְתִּי	אָגִילָה וְאֶשְׂמְחָה בְּחַסְדֶּךָ

אֲשֶׁר רָאִיתָ אֶת־עָנְיִי	יָדַעְתָּ בְּצָרוֹת נַפְשִׁי
וְלֹא הִסְגַּרְתַּנִי בְּיַד־אוֹיֵב	הֶעֱמַדְתָּ בַמֶּרְחָב רַגְלָי

חָנֵּנִי יְהוָה	כִּי צַר־לִי
עָשְׁשָׁה בְכַעַס עֵינִי	נַפְשִׁי וּבִטְנִי

כִּי כָלוּ בְיָגוֹן חַיַּי	וּשְׁנוֹתַי בַּאֲנָחָה
כָּשַׁל בַּעֲוֹנִי כֹחִי	וַעֲצָמַי עָשֵׁשׁוּ־ם	כָּלוּ צֹרְרַי

הָיִיתִי חֶרְפָּה וְלִשֲׁכֵנַי־ם	אֵד וּפַחַד לִמְיֻדָּעָי	רֹאַי בַּחוּץ נָדְדוּ מִמֶּנִּי
נִשְׁכַּחְתִּי כְּמֵת מִלֵּב	הָיִיתִי כִּכְלִי אֹבֵד

כִּי שָׁמַעְתִּי דִּבַּת רַבִּים	מָגוֹר מִסָּבִיב
בְּהִוָּסְדָם יַחַד עָלַי	לָקַחַת נַפְשִׁי זָמָמוּ

וַאֲנִי עָלֶיךָ בָטַחְתִּי	יְהוָה	אָמַרְתִּי אֱלֹהַי אָתָּה
בְּיָדְךָ עִתֹּתָי	הַצִּילֵנִי מִיַּד־אוֹיְבַי	וּמֵרֹדְפָי

הָאִירָה פָנֶיךָ עַל־עַבְדֶּךָ	הוֹשִׁיעֵנִי בְחַסְדֶּךָ
יְהוָה אַל־אֵבוֹשָׁה	כִּי קְרָאתִיךָ

יֵבֹשׁוּ רְשָׁעִים	יֻדּוּמוּ לִשְׁאוֹל
תֵּאָלַמְנָה שִׂפְתֵי שָׁקֶר	הַדֹּבְרוֹת עַל־צַדִּיק עָתִיק	בְּגַאֲוָה וָבוּז

מָה רַב־טוּבְךָ	אֲשֶׁר־צָפַנְתָּ לִּירֵאֶיךָ
פָּעַלְתָּ לַחֹסִים בָּךְ	נֶגֶד בְּנֵי אָדָם

תַּסְתִּירֵם בְּסֵתֶר פָּנֶיךָ	מֵרֻכְסֵי אִישׁ
תִּצְפְּנֵם בְּסֻכָּה	מֵרִיב לְשֹׁנוֹת

בָּרוּךְ יְהוָה

כִּי הִפְלִיא חַסְדּוֹ לִי

בְּעִיר מָצוֹר

וַאֲנִי אָמַרְתִּי בְחָפְזִי	נִגְרַזְתִּי מִנֶּגֶד עֵינֶיךָ
אָכֵן שָׁמַעְתָּ קוֹל תַּחֲנוּנַי	בְּשַׁוְּעִי אֵלֶיךָ

אֶהֱבוּ אֶת־יְהוָה כָּל־חֲסִידָיו	אֱמוּנִים נֹצֵר יְהוָה
וּמְשַׁלֵּם עַל־יֶתֶר	עֹשֵׂה גַאֲוָה

חִזְקוּ וְיַאֲמֵץ לְבַבְכֶם

כָּל־הַמְיַחֲלִים לַיהוָה