Joseph Kenny OP: The Psalms, 35 (Hebrew)

Psalm 35

Friday Readings 1

רִיבָה יְהוָה אֶת־יְרִיבַי

לְחַם אֶת־לֹחֲמָי

הַחֲזֵק מָגֵן וְצִנָּה	וְקוּמָה בְּעֶזְרָתִי
וְהָרֵק חֲנִית וּסֶגֶר	לִקְרַאת רֹדְפָי
אֱמֹר לְנַפְשִׁי	יְשֻׁעָתֵךְ אָנִי

יֵבֹשׁוּ וְיִכָּלְמוּ	מְבַקְשֵׁי נַפְשִׁי
יִסֹּגוּ אָחוֹר וְיַחְפְּרוּ	חֹשְׁבֵי רָעָתִי

יִהְיוּ כְּמֹץ לִפְנֵי־רוּחַ	וּמַלְאַךְ יְהוָה דּוֹחֶה
יְהִי־דַרְכָּם חֹשֶׁךְ וַחֲלַקְלַקּוֹת	וּמַלְאַךְ יְהוָה רֹדְפָם

כִּי־חִנָּם טָמְנוּ־לִי שַׁחַת	רִשְׁתָּם	חִנָּם חָפְרוּ לְנַפְשִׁי
תְּבוֹאֵהוּ שׁוֹאָה לֹא־יֵדָע	וְרִשְׁתּוֹ אֲשֶׁר־טָמַן תִּלְכְּדוֹ	בְּשׁוֹאָה יִפָּל־בָּהּ

וְנַפְשִׁי תָּגִיל בַּיהוָה	תָּשִׂישׂ בִּישׁוּעָתוֹ
כָּל עַצְמוֹתַי תֹּאמַרְנָה	יְהוָה מִי כָמוֹךָ
מַצִּיל עָנִי מֵחָזָק מִמֶּנּוּ	וְעָנִי וְאֶבְיוֹן מִגֹּזְלוֹ

יְקוּמוּן עֵדֵי חָמָס	אֲשֶׁר לֹא־יָדַעְתִּי יִשְׁאָלוּנִי
יְשַׁלְּמוּנִי רָעָה תַּחַת טוֹבָה	שְׁכוֹל לְנַפְשִׁי

וַאֲנִי בַּחֲלוֹתָם	לְבוּשִׁי שָׂק
עִנֵּיתִי בַצּוֹם נַפְשִׁי	וּתְפִלָּתִי עַל־חֵיקִי תָשׁוּב	כְּרֵעַ־כְּאָח לִי
הִתְהַלָּכְתִּי כַּאָבֵל־אֵם	קֹדֵר שַׁחוֹתִי

וּבְצַלְעִי שָׂמְחוּ וְנֶאֱסָפוּ	נֶאֶסְפוּ עָלַי נוֹכִים
וְלֹא יָדַעְתִּי קָרְעוּ	וְלֹא־דָמּוּ בְּחֹנְפִי
לוֹעֲגֵי מָעוֹג	חָרֹק עָלַי שִׁנֵּימוֹ

אֲדֹנָי כַּמָּה תִּרְאֶה	הָשִׁיבָה נַפְשִׁי מִשֹּׁאֵיהֶם	מִכְּפִירִים יְחִידָתִי
אוֹדְךָ בְּקָהָל רָב	בְּעַם עָצוּם אֲהַלְלֶךָּ

אַל־יִשְׂמְחוּ־לִי אֹיְבַי שֶׁקֶר	שֹׂנְאַי חִנָּם יִקְרְצוּ־עָיִן
כִּי לֹא שָׁלוֹם יְדַבֵּרוּ	וְעַל רִגְעֵי־אֶרֶץ

דִּבְרֵי מִרְמוֹת יַחֲשֹׁבוּן	וַיַּרְחִיבוּ עָלַי פִּיהֶם
אָמְרוּ הֶאָח הֶאָח	רָאֲתָה עֵינֵינוּ

רָאִיתָה יְהוָה אַל־תֶּחֱרַשׁ	אֲדֹנָי אֲל־תִּרְחַק מִמֶּנִּי
הָעִירָה וְהָקִיצָה לְמִשְׁפָּטִי	אֱלֹהַי וַאדֹנָי לְרִיבִי

שָׁפְטֵנִי כְצִדְקְךָ יְהוָה	אֱלֹהָי וְאַל־יִשְׂמְחוּ־לִי
אַל־יֹאמְרוּ בְלִבָּם	הֶאָח נַפְשֵׁנוּ	אַל־יֹאמְרוּ בִּלַּעֲנוּהוּ

יֵבֹשׁוּ וְיַחְפְּרוּ יַחְדָּו	שְׂמֵחֵי רָעָתִי
יִלְבְּשׁוּ־בֹשֶׁת וּכְלִמָּה	הַמַּגְדִּילִים עָלָי

יָרֹנּוּ וְיִשְׂמְחוּ	חֲפֵצֵי צִדְקִי
וְיֹאמְרוּ תָמִיד	יִגְדַּל יְהוָה	הֶחָפֵץ שְׁלוֹם עַבְדּוֹ

וּלְשׁוֹנִי תֶּהְגֶּה צִדְקֶךָ

כָּל־הַיּוֹם תְּהִלָּתֶךָ