Joseph Kenny OP: The Psalms, 36 (Hebrew)

Psalm 36

Wednesday Morning 1

נְאֻם־פֶּשַׁע לָרָשָׁע בְּקֶרֶב לִבִּי	אֵין־פַּחַד אֱלֹהִים לְנֶגֶד עֵינָיו
כִּי־הֶחֱלִיק אֵלָיו בְּעֵינָיו	לִמְצֹא עֲוֹנוֹ לִשְׂנֹא
דִּבְרֵי־פִיו אָוֶן וּמִרְמָה	חָדַל לְהַשְׂכִּיל לְהֵיטִיב
אָוֶן יַחְשֹׁב עַל־מִשְׁכָּבוֹ	יִתְיַצֵּב עַל־דֶּרֶךְ לֹא־טוֹב	רָע לֹא יִמְאָס

יְהוָה בְּהַשָּׁמַיִם חַסְדֶּךָ	אֱמוּנָתְךָ עַד־שְׁחָקִים
צִדְקָתְךָ כְּהַרְרֵי־אֵל	מִשְׁפָּטֶךָ תְּהוֹם רַבָּה

אָדָם־וּבְהֵמָה תוֹשִׁיעַ יְהוָה

מַה־יָּקָר חַסְדְּךָ

אֱלֹהִים וּבְנֵי אָדָם	בְּצֵל כְּנָפֶיךָ יֶחֱסָיוּן
יִרְוְיֻן מִדֶּשֶׁן בֵּיתֶךָ	וְנַחַל עֲדָנֶיךָ תַשְׁקֵם

כִּי־עִמְּךָ מְקוֹר חַיִּים	בְּאוּרְךָ נִרְאֶה־אוֹר
מְשֹׁךְ חַסְדְּךָ לְיֹדְעֶיךָ	וְצִדְקָתְךָ לְיִשְׁרֵי־לֵב
אַל־תְּבוֹאֵנִי רֶגֶל גַּאֲוָה	וְיַד־רְשָׁעִים אַל־תְּנִדֵנִי
שָׁם נָפְלוּ פֹּעֲלֵי אָוֶן	דֹּחוּ וְלֹא־יָכְלוּ קוּם