Joseph Kenny OP: The Psalms, 45 (Hebrew)

Psalm 45

Monday Evening 2. Saturday Midday 4

רָחַשׁ לִבִּי דָּבָר טוֹב	אֹמֵר אָנִי מַעֲשַׂי	לְ־מֶלֶךְ
לְשׁוֹנִי עֵט	סוֹפֵר מָהִיר

יָפְיָפִיתָ מִבְּנֵי אָדָם	הוּצַק חֵן בְּשִׂפְתוֹתֶיךָ
עַל־כֵּן בֵּרַכְךָ	אֱלֹהִים לְעוֹלָם

חֲגוֹר־חַרְבְּךָ עַל־יָרֵךְ	גְבַר הוֹדְךָ	וְהַדְרֵךְ הֲדָרֶךָ
צְלַח רְכַב	עַל־דְּבַר־אֱמֶת	וְעָנָו הַצְדֵק

וְתוֹרְךָ נוֹרָאוֹת יְמִינֶךָ	חִצֶּיךָ שְׁנוּנִים
עַמִּים תַּחְתֶּיךָ יִפְּלוּ	בְּלֵב אוֹיְבֵי הַמֶּלֶךְ

כִּסֵּאֲךָ אֱלֹהִים	עוֹלָם וָעֶד
שֵׁבֶט מִישֹׁר	שֵׁבֶט מַלְכוּתֶךָ

אָהַבְתָּ צֶּדֶק	וַתִּשְׂנָא רֶשַׁע
עַל־כֵּן מְשָׁחֲךָ	אֱלֹהִים אֱלֹהֶיךָ

שֶׁמֶן שָׂשׂוֹן	מֵחֲבֵרֶיךָ
מֹר־וַאֲהָלוֹת קְצִיעוֹת	כָּל־בִּגְדֹתֶיךָ

מַן־הֵיכְלֵי שֵׁן	מַן יְשַׂמְּחוּךָ
בְּנוֹת מְלָכִים	בְּיִקְּרוֹתֶיךָ נִצְּבָה
שֵׁגַל לִימִינְךָ	בְּכֶתֶם אוֹפִיר

שִׁמְעִי־בַת וּרְאִי וְהַטִּי אָזְנֵךְ	וְשִׁכְחִי עַמֵּךְ וּבֵית אָבִיךְ
וְיִתְאָו הַמֶּלֶךְ יָפְיֵךְ	כִּי־הוּא אֲדֹנַיִךְ	וְהִשְׁתַּחֲוִי־לוֹ
וּבַת־צֹר בְּמִנְחָה	פָּנַיִךְ יְחַלּוּ	עֲשִׁירֵי עָם

כָּל־כְּבוּדָּה בַת־מֶלֶךְ	פְּנִימָה מִמִּשְׁבְּצוֹת זָהָב	לְבוּשָׁהּ לְרוֹקָמוֹת
תּוּבַל לַמֶּלֶךְ בְּתוּלוֹת	אַחֲרֶיהָ רֵעוֹתֶיהָ מוּבָאוֹת
לֵךְ תּוּבַלְנָה	בִּשְׂמָחֹת וָגִיל	תְּבֹאֶינָה בְּהֵיכַל מֶלֶךְ

תַּחַת אֲבֹתֶיךָ יִהְיוּ בָנֶיךָ	תְּשִׁיתֵמוֹ לְשָׂרִים בְּכָל־הָאָרֶץ
אַזְכִּירָה שִׁמְךָ בְּכָל־דֹּר וָדֹר	עַל־כֵּן עַמִּים יְהוֹדֻךָ לְעֹלָם וָעֶד