Joseph Kenny OP: The Psalms, 59 (Hebrew)

Psalm 59

Friday Midday 2

הַצִּילֵנִי מֵאֹיְבַי אֱלֹהָי	מִּמִתְקוֹמְמַי תְּשַׂגְּבֵנִי
הַצִּילֵנִי מִפֹּעֲלֵי אָוֶן	וּמֵאַנְשֵׁי דָמִים הוֹשִׁיעֵנִי

כִּי הִנֵּה אָרְבוּ לְנַפְשִׁי	יָגוּרוּ עָלַי עַזִים
לֹא־פִשְׁעִי	וְלֹא־חַטָּאתִי יְהוָה
בְּלִי־עָוֹן	יְרוּצוּן וְיִכּוֹנָנוּ

עוּרָה לִקְרָאתִי	וּרְאֵה וְאַתָּה
יְהוָה־אֱלֹהִי־ם צְבָאוֹת	אֱלֹהֵי יִשְׂרָאֵל
הָקִיצָה לִפְקֹד כָּל־הַגּוֹיִם	אַל־תָּחֹן כָּל־בֹּגְדֵי אָוֶן

יָשׁוּבוּ לָעֶרֶב	יֶהֱמוּ כַכָּלֶב	וִיסוֹבְבוּ עִיר
הִנֵּה יַבִּיעוּן בְּפִיהֶם	חֲרָבוֹת בְּשִׂפְתוֹתֵיהֶם	כִּי־מִי שֹׁמֵעַ

וְאַתָּה יְהוָה תִּשְׂחַק־לָמוֹ

תִּלְעַג לְכָל־גּוֹיִם

עֻזּוּ אֵלִי	כִּי אֶשָּׁמֵרָה
כִּי־אֱלֹהִים מִשְׂגַּבִּי	אֱלֹהַי חַסְדּוּ
יְקַדְּמֵנִי אֱלֹהִים	יַרְאֵנִי בְשֹׁרְרָי

אֵל תַּהַרְגֵם	פֶּן־יִשְׁכְּחוּ עַמִּי
הֲנִיעֵמוֹ בְחֵילְךָ	וְהוֹרִידֵמוֹ	מְגָנֵּנוּ אֲדֹנָי

חַטַּאת־פִּימוֹ	דְּבַר־שְׂפָתֵימוֹ	וְיִלָּכֵדוּ
בִגְאוֹנָם	וּמֵאָלָה וּמִכַּחַשׁ	יִסָּפֵּרוּ
כַּלֵּה בְחֵמָה	כַּלֵּה וְאַיֵּנֵמוֹ

וְיֵדְעוּ כִּי־אֱלֹהִים

מֹשֵׁל בְּיַעֲקֹב

לְאַפְסֵי הָאָרֶץ

וְיָשׁוּבוּ לָעֶרֶב	יֶהֱמוּ כַכָּלֶב	וִיסוֹבְבוּ עִיר
הָמוֹה יְנוּעוּן לֶאֱכֹל	אִם־לֹא יִשְׂבְּעוּ וַיָּלִינוּ

וַאֲנִי אָשִׁיר עֻזֶּךָ	וַאֲרַנֵּן לַבֹּקֶר חַסְדֶּךָ
כִּי־הָיִיתָ מִשְׂגָּב לִי	וּמָנוֹס בְּיוֹם צַר־לִי

עֻזִּי אֵלִי	כִּי אֶזָמֵּרָה
כִּי־אֱלֹהִים מִשְׂגַּבִּי	אֱלֹהַי חַסְדִּי