Joseph Kenny OP: The Psalms, 88 (Hebrew)

Psalm 88

Tuesday Midday 4 / Friday Compline

יְהוָה אֱלֹהֵי יְשׁוּעָתִי	יוֹם־צָעַקְתִּי	בַלַּיְלָה נֶגְדֶּךָ
תָּבוֹא לְפָנֶיךָ תְּפִלָּתִי	הַטֵּה־אָזְנְךָ לְרִנָּתִי

כִּי־שָׂבְעָה בְרָעוֹת נַפְשִׁי	וְחַיַּי לִשְׁאוֹל הִגִּיעוּ
נֶחְשַׁבְתִּי עִם־יוֹרְדֵי בוֹר	הָיִיתִי כְּגֶבֶר אֵין־אֱיָל

בַּמֵּתִים חָפְשִׁי	כְּמוֹ חֲלָלִים	מִשְׁכָבִי קֶבֶר
אֲשֶׁר לֹא זְכַרְתָּם עוֹד	וְהֵמָּה מִיָּדְךָ נִגְזָרוּ

שַׁתַּנִי בְּבוֹר תַּחְתִּיּוֹת	בְּמַחֲשַׁכִּים בִּמְצֹלוֹת
עָלַי סָמְכָה חֲמָתֶךָ	וְכָל־מִשְׁבָּרֶיךָ עִנִּיתָ

הִרְחַקְתָּ מְיֻדָּעַי מִמֶּנִּי	שַׁתַּנִי תוֹעֵבוֹת לָמוֹ
כָּלֻא וְלֹא אֵצֵא	עֵינִי דָאֲבָה מִנִּי עֹנִי

קְרָאתִיךָ יְהוָה בְּכָל־יוֹם

שִׁטַּחְתִּי אֵלֶיךָ כַפָּי

הֲלַמֵּתִים תַּעֲשֶׂה־פֶּלֶא	אִם־רְפָאִים יָקוּמוּ יוֹדוּךָ
הַיְסֻפַּר בַּקֶּבֶר חַסְדֶּךָ	אֱמוּנָתְךָ בָּאֲבַדּוֹן
הֲיִוָּדַע בַּחֹשֶׁךְ פִּלְאֶךָ	וְצִדְקָתְךָ בְּאֶרֶץ נְשִׁיָּה

וַאֲנִי אֵלֶיךָ יְהוָה שִׁוַּעְתִּי

וּבַבֹּקֶר תְּפִלָּתִי תְקַדְּמֶךָּ

לָמָה יְהוָה תִּזְנַח נַפְשִׁי	תַּסְתִּיר פָּנֶיךָ מִמֶּנִּי
עָנִי אֲנִי וְגוֹעֵ־ם נֹעַר	נָשָׂאתִי אֵמֶיךָ אָפוּנָה
עָלַי עָבְרוּ חֲרוֹנֶיךָ	בִּעוּתֶיךָ צִמְּתוּתֻנִי
סַבּוּנִי כַמַּיִם	כָּל־הַיּוֹם	הִקִּיפוּ עָלַי יָחִיד
הִרְחַקְתָּ מִמֶּנִּי אֹהֵב וָרֵעַ	מְיֻדָּעַי מַחְשָׁךְ