Joseph Kenny OP: The Psalms, 91 (Hebrew)

Psalm 91

Sunday Compline

יֹשֵׁב בְּסֵתֶר עֶלְיוֹן		בְּצֵל שַׁדַּי יִתְלוֹנָן
	אֲמֹר
לַ־יהוָה מַחְסִי וּמְצוּדָתִי		אֱלֹהַי אֶבְטַח־בּוֹ

כִּי הוּא יַצִּילְךָ מִפַּח	יָקוּשׁ מִדְּבַר הַוּוֹת
בְּאֶבְרָתוֹ יָסֶךְ לָךְ	וְתַחַת־כְּנָפָיו תֶּחְסֶה	צִנָּה וְסֹחֵרָה אַמַּתּוֹ

לֹא־תִירָא מִפַּחַד לָיְלָה	מֵחֵץ יָעוּף יוֹמָם
מִדֶּבֶר בָּאֹפֶל יַהֲלֹךְ	מִקֶּטֶב יֵשׁוֹד צָהֳרָיִם

יִפֹּל מִצִּדְּךָ אֶלֶף	וּרְבָבָה מִימִינֶךָ	אֵלֶיךָ לֹא יִגָּשׁ
רָקָב עֵינֶיךָ תַבִּיט	וְשִׁלֻּמַת רְשָׁעִים תִּרְאֶה

כִּי־אוֹתוֹה יְהוָה מַחְסִי	עֶלְיוֹן שַׂמְתָּ מְעוֹנֶךָ
לֹא־תְאֻנֶּה אֵלֶיךָ רָעָה	וְנֶגַע לֹא־יִקְרַב בְּאָהֳלֶךָ

כִּי מַלְאָכָיו יְצַוֶּה־לָּךְ	לִשְׁמָרְךָ בְּכָל־דְּרָכֶיךָ
עַל־כַּפַּיִם יִשָּׂאוּנְךָ	פֶּן־תִּגֹּף בָּאֶבֶן רַגְלֶךָ
עַל־שַׁחַל וָפֶתֶן תִּדְרֹךְ	תִּרְמֹס כְּפִיר וְתַנִּין

כִּי בִי חָשַׁק וַאֲפַלְּטֵהוּ	אֲשַׂגְּבֵהוּ כִּי־יָדַע שְׁמִי
יִקְרָאֵנִי וְאֶעֱנֵהוּ	עִמּוֹ־אָנֹכִי בְצָרָה	אֲחַלְּצֵהוּ וַאֲכַבְּדֵהוּ
אֹרֶךְ יָמִים אַשְׂבִּיעֵהוּ	וְאַרְאֵהוּ בִּישׁוּעָתִי