Joseph Kenny OP: The Psalms, 96 (Hebrew)

Psalm 96

Monday Morning 3

שִׁירוּ לַיהוָה שִׁיר חָדָשׁ	שִׁירוּ לַיהוָה כָּל־הָאָרֶץ	שִׁירוּ לַיהוָה בָּרֲכוּ שְׁמוֹ
בַּשְּׂרוּ מִיָּם־לְיָם יְשׁוּעָתוֹ	סַפְּרוּ בַגּוֹיִם כְּבוֹדוֹ	בְּכָל־הָעַמִּים נִפְלְאוֹתָיו

כִּי גָדוֹל יְהוָה וּמְהֻלָּל מָאֵד	נוֹרָא הוּא עַל־כָּל־אֱלֹהִים	כִּי כָּל־אֱלֹהֵי הָעַמִּים אֱלִילִים
וַיהוָה שָׁמַיִם עָשָׂה	הוֹד־וְהָדָר לְפָנָיו	עֹז וְתִפְאֶרֶת בְּמִקְדָּשׁוֹ

הָבוּ לַיהוָה מִשְׁפְּחוֹת עַמִּים	הָבוּ לַיהוָה כָּבוֹד וָעֹז	הָבוּ לַיהוָה כְּבוֹד שְׁמוֹ
שְׂאוּ־מִנְחָה וּבֹאוּ לְחַצְרוֹתָיו	הִשְׁתַּחֲווּ לַיהוָה בְּהַדְרַת־קֹדֶשׁ	חִילוּ מִפָּנָיו כָּל־הָאָרֶץ

אִמְרוּ בַגּוֹיִם יְהוָה מָלָךְ	אַף־תִּכּוֹן תֵּבֵל בַּל־תִּמּוֹט	יָדִין עַמִּים בְּמֵישָׁרִים
יִשְׂמְחוּ הַשָּׁמַיִם וְתָגֵל הָאָרֶץ	יִרְעַם הַיָּם וּמְלֹאוֹ	יַעֲלֹז שָׂדַי וְכָל־אֲשֶׁר־בּוֹ

אָז יְרַנְּנוּ כָּל־עֲצֵי־יָעַר	לִפְנֵי יְהוָה כִּי בָא	כִּי בָא לִשְׁפֹּט הָאָרֶץ
יִשְׁפֹּט־תֵּבֵל בְּצֶדֶק	וְעַמִּים בֶּאֱמוּנָתוֹ