PRAYERS: TEMPORAL CYCLE
Advent 1
Excita, quaesumus Domine, potentiam tuam et veni
ut ab imminentibus peccatorum nostrorum periculis
te mereamur protegente eripi,
te liberante salvari.
Advent 2
Excita, Domine, corda nostra ad praeparandas Unigeniti tui vias,
ut per ejus adventum
purificatis tibi mentibus servire mereamur.
Advent 3
Aurem tuam, quaesumus, Domine,
precibus nostris accomoda,
et mentis nostrae tenebras
gratia tuae visitationis illustra.
Advent 4
Excita, quaesumus Domine, potentiam tuam et veni,
et magna nobis virute succurre,
ut per auxilium gratiae tuae,
quod nostra peccata praepediunt,
indulgentia tuae propitiationis acceleret.
17 December
Praesta, quaesumus omnipotens Deus
ut redemptionis nostrae ventura solemnitas
et praesentis nobis vitae subsidia conferat
et aeternae beatitudinis praemia largiatur.
18 December
Excita, quaesumus Domine, potentiam tuam et veni
ut hi qui in tua pietate confidunt
ab omni citius adversitate liberentur.
19 December
Deus qui conspicis quia ex nostra pravitate affligimur
concede propitius
ut ex tua visitatione consolemur.
20 December
Indignos nos quaesumus Domine famulos tuos
quos actionis propriae culpa contristat
unigeniti Filii tui adventu laetifica.
21 December
Praesta quaesumus omnipotens Deus
ut Filii tui ventura solemnitas
et praesentis nobis vitae remedia conferat
et praemia aeterna concedat.
22 December
Preces populi tui quaesumus Domine clementer exaudi
ut qui juste pro peccatis nostris affligimur
pietatis tuae visitatione consolemur.
23 December
Deus qui de beatae Mariae Virginis utero
Verbum tuum Angelo nuntiante carnem suscipere voluisti
praesta supplicibus tuis
ut qui vere eam genitricem Dei credimus
ejus apud te intercessionibus adjuvemur.
Vigil of Christmas
Deus, qui nos redemptionis nostrae annua expectatione laetificas,
praesta ut Unigenitum tuum,
quem redemptorem laeti suscipimus,
venientem quoque judicem securi videamus.
Dominum nostrum...
Christmas
Concede, quaesumus omnipotens Deus,
ut nos Unigeniti tui nova per carnem Nativitas liberet,
quos sub peccati jugo vetusta servitus tenet.

Stephen (26 Dec)
Da nobis, quaesumus Domine,
imitari quod colimus, ut discamus et inimicos diligere,
quia ejus natalitia celebramus,
qui novit etiam pro persecutoribus exorare
Christum Dominum nostrum.
John (27 Dec)
Ecclesiam tuam Domine benignus illustra,
ut beati Joannis Apostoli tui et Evangelistae illuminata doctrinis,
ad dona perveniat sempiterna.
Holy Innocents (28 Dec)
Deus, cuius hodierna die praeconium Innocentes Martyres,
non loquendo sed moriendo, confessi sunt,
omnia in nobis vitiorum mala mortifica,
ut fidem tuam, quam lingua nostra loquitur,
etiam moribus vita fateatur.
Holy Family
Domine Jesu Christe, qui Mariae et Joseph subditus,
domesticam vitam ineffabilibus virtutibus consecrasti,
fac nos, utriusque auxilio,
Familiae sanctae tuae exemplis instrui,
et consortium consequi sempiternum.
Mary Mother of God
Deus, qui salutis aeternae, beatae Mariae virginitate fecunda,
humano generi praemia praestitisti,
tribue, quaesumus,
ut ipsam pro nobis intercedere sentiamus
per quam meruimus Filium tuum auctorem vitae suscipere.
Epiphany
Deus, qui hodierna die Unigenitum tuum Gentibus stella duce revelasti,
concede propitius ut qui jam te ex fide cognovimus,
usque ad contemplandam speciem tuae celsitudinis perducamur.
Baptism of the Lord
Omnipotens semiterne Deus,
qui Christum, in Iordane flumine baptizatum,
Spiritu Sancto super eum descendente
dilectum Filium tuum sollemniter declarasti
concede filiis adoptionis tuae
ex aqua et Spiritu Sancto renatis
ut in beneplacito tuo iugiter perseverent.

Ash Wednesday
Praesta Domine fidelibus tuis
ut jejuniorum veneranda solemnia
et congua pietate suscipiant
et secura devotione percurrant.
Ash Thursday
Deus, qui culpa offenderis, poenitentia placaris,
preces populi tui supplicantis propitius respice,
et flagella tuae iracundiae,
quae pro peccatis nostris meremur, averte.
Ash Friday
Incohata jejunia, quaesumus Domine, benigno favore prosequere,
ut observantiam quam corporaliter exhibemus
mentibus etiam sinceris exercere valeamus.
Ash Saturday
Adesto Domine supplicationibus nostris,
et concede ut hoc solemne jejunium,
quod animabus corporibusque curandis salubriter institutum est,
devoto servitio celebremus.
Lent Sunday 1
Deus, qui Ecclesiam tuam annua quadragesimali observatione purificas,
praesta familiae tuae, ut quod a te obtinere abstinendo nititur,
hoc bonis operibus exsequatur.
Lent Sunday 2
Deus, qui conspicis omni nos virtute destitui,
interius exteriusque custodi,
ut ab omnibus adversitatibus muniamur in corpore
et a pravis cogitationibus mundemur in mente.
Lent Sunday 3
Quaesumus omnipotens Deus, vota humilium respice,
atque ad defensionem nostram dexteram tuae majestatis extende.
Lent Sunday 4
Concede, quaesumus omnipotens Deus,
ut qui ex merito nostrae actionis affligimur,
tuae gratiae consolatione respiremus.
Lent Sunday 5
Quaesumus omnipotens Deus,
familiam tuam propitius respice,
ut te largiente regatur in corpore
et te servante custodiatur in mente.
Lent Sunday 6
Omnipotens sempiterne Deus,
qui humano generi ad imitandum humilitatis exemplum,
Salvatorem nostrum carnem sumere
et crucem subire fecisti,
concede propitius ut et patientiae ipsius habere documenta
et resurrectionis consortia mereamur.
Lent Monday 1
Converte nos Deus salutaris noster,
et ut nobis jejunium quadragesimale proficiat,
mentes nostras caelestibus instrue disciplinis.
Lent Tuesday 1
Respice Domine familiam tuam,
et praesta ut apud te mens nostra tuo desiderio fulgeat,
quae se carnis maceratione castigat.
Lent Wednesday 1
Preces nostras, quaesumus Domine, clementer exaudi,
et contra cuncta nobis adversantia dexteram tuae majestatis extende.
Lent Thursday 1
Devotionem populi tui, quaesumus Domine, benignus intende,
ut qui per abstinentiam macerantur in corpore,
per fructum boni operis reficiantur in mente.
Lent Friday 1
Esto Domine propitius plebi tuae,
et quam tibi facis esse devotam,
benigno refove miseratus auxilio.
Lent Saturday 1
Populum tuum, quaesumus Domine, propitius respice,
atque ab eo flagella tuae iracundiae clementer averte.
Lent Monday 2
Praesta, quaesumus omnipotens Deus,
ut familia tua, quae se affligendo carnem ab alimentis abstinet,
sectando justitiam a culpa jejunet.
Lent Tuesday 2
Perfice, quaesumus Domine, benignus in nobis observantiae sanctae subsidium,
ut quae te auctore facienda congnovimus,
te operante impleamus.
Lent Wednesday 2
Populum tuum, quaesumus Domine, propitius respice,
et quos ab escis carnalibus praecipis abstinere,
a noxiis quoque vitiis cessare concede.
Lent Thursday 2
Praesta nobis, quaesumus Domine, auxilium gratiae tuae,
ut jejuniis et orationibus convenienter intenti,
liberemur ab hostibus mentis et corporis.
Lent Friday 2
Da, quaesumus omnipotens Deus,
ut sacro nos purificante jejunio,
sinceris mentibus ad sancta ventura facias pervenire.
Lent Saturday 2
Da, quaesumus Domine, nostris effectum jejuniis salutarem,
ut castigatio carnis assumpta
ad nostram vegetationem transeat animarum.
Lent Monday 3
Cordibus nostris, quaesumus Domine, gratiam tuam benignus infunde,
ut sicut ab escis carnalibus abstinemus,
ita sensus quoque nostros a noxiis retrahamus excessibus.
Lent Tuesday 3
Exaudi nos omnipotens et misericors Deus,
et continentiae salutaris propitius nobis dona concede.
Lent Wednesday 3
Praesta nobis, quaesumus Domine,
ut salutaribus jejuniis eruditi,
a noxiis quoque vitiis abstinentes,
propitiationem tuam facilius impetremus.
Lent Thursday 3
Concede, quaesumus omnipotens Deus,
ut jejuniorum nobis sancta devotio
et purificationem tribuat
et majestati tuae nos reddat acceptos.
Lent Friday 3
Jejunia nostra, quaesumus Domine, benigno favore prosequere,
ut sicut ab alimentis abstinemus in corpore,
ita a vitiis jejunemus in mente.
Lent Saturday 3
Praesta, quaesumus omnipotens Deus,
ut qui se affligendo carnem ab alimentis abstinent,
sectando justitiam a culpa jejunent.
Lent Monday 4
Praesta, quaesumus omnipotens Deus,
ut observationes sacras annua devotione recolentes,
et corpore tibi placeamus et mente.
Lent Tuesday 4
Sacrae nobis, quaesumus Domine, observationis jejunia
et piae conversationis augmentum
et tuae propitiationis continuum praestent auxilium.
Lent Wednesday 4
Deus, qui et justis praemia meritorum
et peccatoribus per jejunium veniam praebes,
miserere supplicibus tuis,
ut reatus nostri confessio indulgentiam valeat percipere delictorum.
Lent Thursday 4
Praesta, quaesumus omnipotens Deus,
ut quos jejunia votiva castigant
ipsa quoque devotio sancta laetificet,
ut terrenis affectibus mitigatis,
facilius caelestia capiamus.
Lent Friday 4
Deus, qui ineffabilibus mundum renovas sacramentis,
praesta quaesumus,
ut Ecclesia tua et aeternis proficiat institutis
et temporalibus non destituatur auxiliis.
Lent Saturday 4
Fiat, Domine, quaesumus, per gratiam tuam fructuosus nostrae devotionis affectus,
quia tunc nobis proderunt suscepta jejunia
si tuae sint palcita pietati.
Lent Monday 5
Sanctifica, quaesumus Domine, nostra jejunia,
et cunctarum nobis indulgentiam propitius largire culparum.
Lent Tuesday 5
Nostra tibi, Domine quaesumus, sint accepta jejunia,
quae nos et expiando gratia tua dignos efficiant
et ad remedia perducant aeterna.
Lent Wednesday 5
Sanctificato hoc jejunio, Deus,
tuorum corda fidelium miserator illustra,
et quibus devotionis praestas affectum,
praebe supplicantibus pium benignus auditum.
Lent Thursday 5
Praesta, quaesumus omnipotens Deus,
ut dignitas conditionis humanae,
per immoderationem sauciata,
medicinalis parsimoniae studio reformetur.
Lent Friday 5
Cordibus nostris, quaesumus Domine, gratiam tuam benignus infunde,
ut peccata nostra castigatione voluntaria cohibentes,
temporaliter potius maceremur
quam suppliciis deputemur aeternis.
Lent Saturday 5
Proficiat, quaesumus Domine, plebs tibi dicata piae devotionis affectu,
ut sacris actionibus erudita,
quanto majestati tuae fit gratior
tanto donis potioribus augeatur.
Lent Monday 6
Da, quaesumus omnipotens Deus
ut qui in tot adversis ex nostra infirmitate deficimus,
intercedente unigeniti Filii tui passione respiremus.
Lent Tuesday 6
Omnipotens sempiterne Deus
da nobis ita Dominicae passionis sacramenta peragere,
ut indulgentiam percipere mereamur.
Lent Wednesday 6
Praesta, quaesumus omnipotens Deus
ut qui nostris excessibus incessanter affligimur,
per unigeniti Filii tui passionem liberemur.

Lent Holy Thursday
Deus, a quo et Judas reatus sui poenam
et confessionis suae latro praemium sumpsit,
concede nobis tuae propitiationis effectum,
ut sicut in passione sua Jesus Christus Dominus noster diversa utrisque intulit stipendia meritorum,
ita nobis ablato vetustatis errore
resurrectionis suae gratiam largiatur.
(Office ends with prayer.)

Lent Good Friday & Holy Saturday
Respice, quaesumus Domine, super hanc familiam tuam
pro qua Dominus noster Jesus Christus
non dubitavit manibus tradi nocentium
et Crucis subire tormentum.
(Office ends with prayer.)
Easter Sunday
Deus, qui hodierna die per Unigenitum tuum,
aeternitatis nobis aditum devicta morte reserasti,
vota nostra, quae praeveniendo aspiras
etiam adjuvando prosequere.
Easter Monday
Deus, qui solemnitate Paschali mundo remedia contulisti,
populum tuum, quaesumus, caelesti dono prosequere,
ut et perfectam libertatem consequi mereatur
et ad vitam proficiat sempiternam.
Easter Tuesday
Deus, qui Ecclesiam tuam novo semper fetu multiplicas,
concede famulis tuis, ut sacramentum vivendo teneant
quod fide perceperunt.
Easter Wednesday
Deus, qui nos Resurrectionis Dominicae annua solemnitate laetificas,
concede propitius,
ut per temporalia festa quae agimus
pervenire ad gaudia aeterna mereamur.
Easter Thursday
Deus, qui diversitatem gentium in confessione tui nominis adunasti,
da ut renatis fonte baptismatis,
una sit fides mentium
et pietas actionum.
Easter Friday
Omnipotens sempiterne Deus,
qui Paschale sacramentum in reconciliationis humanae foedere contulisti,
da mentibus nostris
ut quod professione celebramus
imitemur effectu.
Easter Saturday
Concede, quaesumus omnipotens Deus
ut qui festa Paschalia venerando egimus,
per haec contingere ad gaudia aeterna mereamur.
Easter 2
Praesta, quaesumus, omnipotens Deus,
ut qui Paschalia festa peregimus,
haec te largiente moribus et vita teneamus.

Easter 3
Deus, qui in Filii tui humilitate jacentem mundum erexisti,
fidelibus tuis perpetuam concede laetitiam,
ut quos perpetuae mortis eripuisti casibus
gaudiis facias perfrui sempiternis.
Easter 4
Deus, qui errantibus, ut in viam possint redire justitiae
veritatis tuae lumen ostendis,
da cunctis qui christiana professione censentur
et illa respuere quae huic inimica sunt nomini
et ea quae sunt apta sectari.
Easter 5
Deus, qui fidelium mentes unius efficis voluntatis,
da populis tuis id amare quod praecipis,
id desiderare quod promittis,
ut inter mundanas varietates
ibi nostra fixa sint corda
ubi vera sunt gaudia.
Easter 6
Deus, a quo bona cuncta procedunt,
largire supplicibus tuis
ut cogitemus te inspirante quae recta sunt
et te gubernante eadem faciamus.
Ascension
Concede, quaesumus omnipotens Deus,
ut qui hodierna die Unigenitum tuum Redemptorem nostrum
ad caelos ascendisse credimus,
ipsi quoque mente in caelestibus habitemus.
Ascension Friday & Saturday
Praesta, quaesumus omnipotens Deus,
ut lux tuae lucis corda eorum qui per gratiam tuam renati sunt
Sancti Spiritus illustratione confirmet.
Easter 7
Omnipotens sempiterne Deus,
fac nos tibi semper et devotam gerere voluntatem
et majestati tuae sincero corde servire.
Easter 7 Monday
Deus, qui Apostolis tuis Sanctum dedisti Spiritum,
concede plebi tuae piae petitionis effectum,
ut quibus dedisti fidem
largiaris et pacem.
Easter 7 Tuesday
Adsit nobis, quaesumus Domine, virtus Spiritus Sancti
quae et corda nostra clementer expurget
et ab omnibus tueatur adversis.
Easter 7 Wednesday & Thursday
Mentes nostras, quaesumus Domine,
Paraclitus qui a te procedit illuminet
et inducat in omnem, sicut tuus promisit Filius, veritatem.
Easter 7 Friday
Da, quaesumus, Ecclesiae tuae misericors Deus,
ut Sancto Spiritu congregata,
hostili nullatenus incursione turbetur.
Easter 7 Saturday
Illo nos igne, quaesumus Domine,
Spiritus Sanctus inflamet
quem Dominus noster Jesus Christus misit in terram
et voluit vehementer accendi.
Pentecost
Deus, qui hodierna die corda fidelium Sancti Spiritus illustratione docuisti,
da nobis in eodem Spiritu recta sapere
et de eius consolatione gaudere.