Joseph Kenny OP: The Psalms, 7 (Hebrew)

Psalm 7

Monday Midday 1

יְהוָה אֱלֹהַי בְּךָ חָסִיתִי	הוֹשִׁיעֵנִי מִכָּל־רֹדְפַי
וְהַצִּילֵנִי פֶּן־יִטְרֹף	כְּאַרְיֵה	נַפְשִׁי פֹּרֵק וְאֵין מַצִּיל

יְהוָה אֱלֹהַי אִם־עָשִׂיתִי זֹאת	אִם־יֶשׁ־עָוֶל בְּכַפָּי
אִם־גָּמַלְתִּי שְׁלוּמִי רָע	וָאֲחַלְּצָה צוֹרְרִי רֵיקָם
יִרַדֹּף אוֹיֵב נַפְשִׁי וְיַשֵּׂג	וְיִרְמֹס לָאָרֶץ חַיָּי	וּכְבֵדִי לֶעָפָר יַשְׁכֵּן

קוּמָה יְהוָה בְּאַפֶּךָ	הִנָּשֵׂא בְּעַבְרוֹת צוֹרְרָי
וְעוּרָה אֵלִי	מִשְׁפָּט צִוִּיתָ

וַעֲדַת לְאֻמִּים תְּסוֹבְבֶךָּ	וְעָלֶיהָ לַ־מָּרוֹם שׁוּבָה	יְהוָה יָדִין עַמִּים
שָׁפְטֵנִי יְהוָה כְּצִדְקִי	וּכְתֻמִּי עֵלִי

יִגְמָר־נָא רַע רְשָׁעִים	וּתְכוֹנֵן צַדִּיק
וּבֹחֵן לִבּוֹת וּכְלָיוֹת	אֱלֹהִים צַדִּיק

מְגָנִּי עֵל אֱלֹהִים	מוֹשִׁיעַ יִשְׁרֵי־לֵב
אֱלֹהִים שׁוֹפֵט צַדִּיק	וְאֵל זֹעֵם בְּכָל־יוֹם

אִם־לֵא יָשׁוּב	חַרְבּוֹ יִלְטוֹשׁ	קַשְׁתּוֹ דָרַךְ וַיְכוֹנְנֶהָ
וְלוּ הֵכִין כְּלֵי־מָוֶת	חִצָּיו לְדֹלְקִים יִפְעָל

הִנֵּה יְחַבֶּל־אָוֶן	וְהָרָה עָמָל	וְיָלַד שָׁקֶר
בּוֹר כָּרָה וַיַּחְפְּרֵהוּ	וַיִּפֹּל בְּשַׁחַת יִפְעָל

יָשׁוּב עֲמָלוֹ בְרֹאשׁוֹ	וְעַל קָדְקֳדוֹ חֲמָסוֹ יֵרֵד
אוֹדֶה יְהוָה כְּצִדְקוֹ	וַאֲזַמְּרָה שֵׁם־יְהוָה עֶלְיוֹן