Joseph Kenny OP: The Psalms, 29 (Hebrew)

Psalm 29

Monday Morning 1

הָבוּ לַיהוָה בְּנֵי אֵלִים	הָבוּ לַיהוָה כָּבוֹד וָעֹז	הָבוּ לַיהוָה כְּבוֹד שְׁמוֹ
הִשְׁתַּחֲווּ לַיהוָה	בְּהַדְרַת־קֹדֶשׁ

קוֹל יְהוָה עַל־הַמָּיִם	אֵל־הַכָּבוֹד הִרְעִים	יְהוָה עַל־מַיִם רַבִּים
קוֹל־יְהוָה בַּכֹּחַ	קוֹל יְהוָה בֶּהָדָר

קוֹל יְהוָה שֹׁבֵר אֲרָזִים	וַיְשַׁבֵּר יְהוָה אֶת־אַרְזֵי הַלְּבָנוֹן
וַיַּרְקֵד־ם כְּמוֹ־עֵגֶל לְבָנוֹן	וְשִׂרְיֹן כְּמוֹ בֶן־רְאֵמִים

קוֹל־יְהוָה חֹצֵב	לַהֲבוֹת אֵשׁ
קוֹל יְהוָה יָחִיל מִדְבָּר	יָחִיל יְהוָה מִדְבַּר קָדֵשׁ

קוֹל יְהוָה יְחוֹלֵל אַיָּלוֹת	וַיֶּחֱשֹׂף יְעָרוֹת
וּבְהֵיכָלוֹ כֻּלּוֹ	אֹמֵר כָּבוֹד

יְהוָה לַמַּבּוּל יָשָׁב	וַיֵּשֶׁב יְהוָה מֶלֶךְ לְעוֹלָם
יְהוָה עֹז לְעַמּוֹ יִתֵּן	יְהוָה יְבָרֵךְ אֶת־עַמּוֹ בַשָּׁלוֹם