Joseph Kenny OP: The Psalms, 77 (Hebrew)

Psalm 77

Wednesday Morning 2

קוֹלִי אֵל־אֱלֹהִים	וְאֶצְעָקָה
קוֹלִי אֵל־אֱלֹהִים	וְהַאֲזִין

אֵלִי בְּיוֹם צָרָתִי	אֲדֹנָי דָּרָשְׁתִּי
יָדִי לַיְלָה נִגְּרָה	וְלֹא תָפוּג	מֵאֲנָה הִנָּחֵם נַפְשִׁי

אֶזְכְּרָה אֱלֹהִים וְאֶהֱמָיָה	אָשִׂיחָה וְתִתְעַטֵּף רוּחִי
אֳחֻזוֹת שְׁמֻרוֹת עֵינָי	נִפְעַמְתִּי וְלֹא אֲדַבֵּר

חִשַּׁבְתִּי יָמִים מִקֶּדֶם	שְׁנוֹת עוֹלָמִים אֶזְכְּרָה
נִגַּנְתִי בַּלָּיְלָה	עִם־לְבָבִי אָשִׂיחָה	וַיְחַפֵּשׂ רוּחִי

הַלְעוֹלָמִים יִזְנַח אֲדֹנָי	וְלֹא־יֹסִיף לִרְצוֹת עוֹד
הֶאָפֵס לָנֶצַח חַסְדּוֹ	גָּמַר אֹמֶר לְדֹר וָדֹר

הֲשָׁכַח חַנּוֹת אֵל	אִם־קָפַץ בְּאַף רַחֲמָיו
וָאֹמַר חַלּוֹתִי הִיא	שֶׁנֶתּ יְמִין עֶלְיוֹן

אַזְכִּיר מַעַלְלֵי־יָהּ	כִּי־אֶזְכְּרָה מִקֶּדֶם פִּלְאֶךָ
וְהָגִיתִי בְכָל־פָּעֳלֶךָ	וּבַעֲלִילוֹתֶיךָ אָשִׂיחָה

אֱלֹהִים בַּקֹּדֶשׁ דַּרְכֶּךָ	מִי־אֵל גָּדוֹלְךָ אלֹהִים
אֲתֵּה הָאֵל עֹשֵׂה פֶלֶא	הוֹדַעְתָּ בָעַמִּים עֻזֶּךָ
גָּאַלְתָּ בִּזְרוֹעַ עַמֶּךָ	בְּנֵי־יַעֲקֹב וְיוֹסֵף

רָאוּךָ מַּיִם אֱלֹהִים	רָאוּךָ מַּיִם יָחִילוּ	אַף יִרְגְּזוּ תְהֹמוֹת
זֹרְמוּ מַיִם עָבוֹת	קוֹל נָתְנוּ שְׁחָקִים	אַף־חֲצָצֶיךָ יִתְהַלָּכוּ

קוֹל רַעַמְךָ בַּגַּלְגַּל	הֵאִירוּ בְרָקִים תֵּבֵל	רָגְזָה וַתִּרְעַשׁ הָאָרֶץ
בַּיָּם דַּרְכֶּךָ	וּשְׁבָלֶךָ בְּמַיִם רַבִּים	וְעִקְּבוֹתֶיךָ לֹא נֹדָעוּ

נָחִיתָ כַצֹּאן עַמֶּךָ

בְּיַד־מֹשֶׁה וְאַהֲרֹן