Joseph Kenny OP: The Psalms, 79 (Hebrew)

Psalm 79

Thursday Midday 3

אֱלֹהִים בָּאוּ גוֹיִם בְּנַחֲלָתֶךָ	טִמְּאוּ אֶת־הֵיכַל קָדְשֶׁךָ	שָׂמוּ אֶת־יְרוּשָׁלִַם לְעִיִּים
נָתְנוּ אֶת־נִבְלַת עֲבָדֶיךָ	מַאֲכָל לְעוֹף הַשָּׁמָיִם
בְּשַׂר חֲסִידֶיךָ	לְחַיְתוֹ־אָרֶץ
שָׁפְכוּ דָמָם כַּמַּיִם	סְבִיבוֹת יְרוּשָׁלִָם	וְאֵין קוֹבֵר
הָיִינוּ חֶרְפָּה לִשְׁכֵנֵינוּ	לַעַג וָקֶלֶס לִסְבִיבוֹתֵינוּ

עַד־מָה יְהוָה	תֶּאֱנַף לָנֶצַח	תִּבְעַר כְּמוֹ־אֵשׁ קִנְאָתֶךָ
שְׁפֹךְ חֲמָתְךָ אֵל	הַגּוֹיִם אֲשֶׁר לֹא־יְדָעוּךָ
וְעַל מַמְלָכוֹת	אֲשֶׁר בְּשִׁמְךָ לֹא קָרָאוּ
כִּי אָכֹל אֶת־יַעֲקֹב	וְאֶת־נָוֵהוּ הֵשַׁמּוּ

אַל־תִּזְכֵּר־לָנוּ	עֲוֹנֹת רִאשֹׁנִים מַהִיר
יְקַדְּמוּנוּ רַחֲמֶיךָ	כִּי דַלּוֹנוּ מְאֹד

עָזְרֵנוּ אֱלֹהֵי יִשְׁעֵנוּ	עַל־דְּבַר כְּבוֹד־שְׁמֶךָ וְהַצִּילֵנוּ
וְכַפֵּר עַל־חַטֹּאתֵינוּ	לְמַעַן שְׁמֶךָ
לָמָּה יֹאמְרוּ הַגּוֹיִם	אַיֵּה אֱלֹהֵיהֶם
יִוָּדַע בַּגֹּיִּים לְעֵינֵינוּ	נָקַמְתָ דַּם־עֲבָדֶיךָ הַשָּׁפוּךְ

תָּבוֹא לְפָנֶיךָ	אֶנְקַת אָסִיר
כְּגֹדֶל זְרוֹעֲךָ	הוֹתֵר בְּנֵי תְמוּתָה
וְהָשֵׁב לִשְׁכֵנֵינוּ שִׁבְעָתַיִם	אֶל־חֵיקָם	חֶרְפָּתָם אֲשֶׁר חֵרְפוּךָ אֲדֹנָי
וַאֲנַחְנוּ עַמְּךָ וְצֹאן מַרְעִיתֶךָ	נוֹדֶה לְּךָ לְעוֹלָם
לְדֹר וָדֹר	נְסַפֵּר תְּהִלָּתֶךָ