Joseph Kenny OP: The Psalms, 81 (Hebrew)

Psalm 81

Thursday Morning 2

הַרְנִינוּ לֵאלֹהֵי־ם עוּזֵּנוּ	הָרִיעוּ לֵאלֹהֵי יַעֲקֹב
שְׂאוּ־זִמְרָה וּתְנוּ־תֹף	כִּנּוֹר נָעִים עִם־נָבֶל
תִּקְעוּ בַחֹדֶשׁ שׁוֹפָר	בַּכֵּסֶה לְיוֹם חַגֵּנוּ
כִּי חֹק לְיִשְׂרָאֵל הוּא	מִשְׁפָּט לֵאלֹהֵי יַעֲקֹב
עֵדוּת בִּיהוֹסֵף שָׂמוֹ	בְּצֵאתוֹ עַל־אֶרֶץ מִצְרָיִם

שְׂפַת לֹא־יָדַעְתִּי אֶשְׁמָע	הֲסִירוֹתִים סֵּבֶל שִׁכְמוֹ	כַּפָּיו מִדּוּד תַּעֲבֹרְנָה
בַּצָּרָה קָרָאתָ	וָאֲחַלְּצֶךָּ
אֶעֶנְךָ בְּסֵתֶר רַעַם	אֶבָּחֵנְךָ עַל־מֵי מְרִיבָה

שְׁמַע עַמִּי וְאָעִידָה בָּךְ	יִשְׂרָאֵל אִם־תִּשְׁמַע־לִי
לֹא־יִהְיֶה בְךָ אֵל זָר	וְלֹא תִשְׁתַּחֲוֶה לְאֵל נֵכָר

אָנֹכִי יְהוָה אֱלֹהֶיךָ

הַמַּעַלְךָ מֵאֶרֶץ מִצְרָיִם

הַרְחִיב־פִּיךָ וַאֲמַלְאֵהוּ

וְלֹא־שָׁמַע עַמִּי לְקוֹלִי	וְיִשְׂרָאֵל לֹא־אָבָה לִי
וָאֲשַׁלְּחֵהוּ בִּשְׁרִירוּת לִבָּם	יֵלְכוּ בְּמוֹעֲצוֹתֵיהֶם

לוּ עַמִּי שֹׁמֵעַ לִי	יִשְׂרָאֵל בִּדְרָכַי יְהַלֵּכוּ
כִּמְעַט אוֹיְבֵיהֶם אַכְנִיעַ	וְעַל צָרֵיהֶם אָשִׁיב יָדִי
מְשַׂנְאֵי יְהוָה יְכַחֲשׁוּ־לוֹ	וִיהִי עִתָּם לְעוֹלָם
וַיַּאֲכִילֵהוּ מֵחֵלֶב חִטָּה	וּמִצּוּר דְּבַשׁ אַשְׂבִּיעֶךָ