Joseph Kenny OP: The Psalms, 83 (Hebrew)

Psalm 83

אֱלֹהָי מִי אֵל־דֹּמֵי לָךְ

אַל־תֶּחֱרַשׁ וְאַל־תִּשְׁקֹט אֵל

כִּי־הִנֵּה אוֹיְבֶיךָ יֶהֱמָיוּן	וּמְשַׂנְאֶיךָ נָשְׂאוּ רֹאשׁ
עַל־עַמְּךָ יַעֲרִימוּ סוֹד	וְיִתְיָעֲצוּ עַל־צְפוּנֶיךָ
אָמְרוּ לְכוּ וְנַכְחִידֵם מִגּוֹי	וְלֹא־יִזָּכֵר שֵׁם־יִשְׂרָאֵל עוֹד

כִּי נוֹעֲצוּ לֵב יַחְדָּו	עָלֶיךָ בְּרִית יִכְרֹתוּ
אָהֳלֵי אֱדוֹם וְיִשְׁמְעֵאלִים	מוֹאָב וְהַגְרִים

גְּבָל וְעִמּונוּ עֲמָלֵק	פְּלֶשֶׁת עִם־יֹשְׁבֵי צוֹר
גַּם־אַשּׁוּר נִלְוָה עִמָּם	הָיוּ זְרוֹעַ לִבְנֵי־לוֹט

עֲשֵׂה־לָהֶם כְּמִדְיָן	כְּסִיסְרָא	כְיָבִין בְּנַחַל קִישׁוֹן
נִשְׁמְדוּ בְעֵין־דֹּאר	הָיוּ דֹּמֶן לָאֲדָמָה

שִׁיתֵמוֹ נְדִיבֵמוֹ כְּעֹרֵב וְכִזְאֵב	וּכְזֶבַח וּכְצַלְמֻנָּע כָּל־נְסִיכֵמוֹ
אֲשֶׁר אָמְרוּ נִירֲשָׁה לָּנוּ	אֵת נְאוֹת אֱלֹהִים

אֱלֹהַי שִׁיתֵמוֹ כַגַּלְגַּל	כְּקַשׁ לִפְנֵי־רוּחַ
כְּאֵשׁ תִּבְעַר־יָעַר	וּכְלֶהָבָה תְּלַהֵט הָרִים
כֵּן תִּרְדְּפֵם בְּסַעֲרֶךָ	וּבְסוּפָתְךָ תְבַהֲלֵם
מַלֵּא פְנֵיהֶם קָלוֹן	וִיבַקֵשׁ וּשִׁמְךָ יְהוָה
יֵבֹשׁוּ וְיִבָּהֲלוּ	עֲדֵי־עַד	וְיַחְפְּרוּ וְיֹאבֵדוּ

וְיֵדְעוּ כִּי־אַתָּה שִׁמְךָ יְהוָה

לְבַדֶּךָ עֶלְיוֹן עַל־כָּל־הָאָרֶץ