Joseph Kenny OP: The Psalms, 143 (Hebrew)

Psalm 143

Thursday Morning 4, Tuesday Compline

יְהוָה שְׁמַע תְּפִלָּתִי	הַאֲזִינָה אֵל תַּחֲנוּנַי
בֶּאֱמֻנָתְךָ	עֲנֵנִי	בְּצִדְקָתֶךָ

וְאַל־תָּבוֹא בְמִשְׁפָּט אֶת־עַבְדֶּךָ

כִּי לֹא־יִצְדַּק לְפָנֶיךָ כָל־חָי

כִּי רָדַף אוֹיֵב נַפְשִׁי	דִּכָּא לָאָרֶץ חַיָּתִי
הוֹשִׁיבַנִי בְמַחֲשַׁכִּים	כְּמְתֵי עוֹלָם
וַתִּתְעַטֵּף עָלַי רוּחִי	בְּתוֹכִי יִשְׁתּוֹמֵם לִבִּי

זָכַרְתִּי יָמִים מִקֶּדֶם

הָגִיתִי בְכָל־פָּעֳלֶךָ

בְּמַעֲשֵׂה יָדֶיךָ אֲשׂוֹחֵחַ

פֵּרַשְׂתִּי יָדַי אֵלֶיךָ	נַפְשִׁי בְּאֶרֶץ עָיְפָה לְךָ
מַהֵר עֲנֵנִי יְהוָה	כָּלְתָה רוּחִי אֵל
תַּסְתֵּר פָּנֶיךָ מִמֶּנִּי	וְנִמְשַׁלְתִּי עִם־יֹרְדֵי בוֹר

הַשְׁמִיעֵנִי בַבֹּקֶר חַסְדֶּךָ	כִּי־בְךָ בָטָחְתִּי
הוֹדִיעֵנִי דֶּרֶךְ־זוּ אֵלֵךְ	כִּי־אֵלֶיךָ נָשָׂאתִי נַפְשִׁי

הַצִּילֵנִי מֵאֹיְבַי יְהוָה

אֵלִי כִּי־כֻסֵּתִי

לַמְּדֵנִי לַעֲשׂוֹת רְצוֹנֶךָ	כִּי־אַתָּה אֱלוֹהָי
רוּחֲךָ טוֹבָה	תַּנְחֵנִי	בְּאֶרֶץ מִישׁוֹר

לְמַעַן־שִׁמְךָ יְהוָה תְּחַיֵּנִי	בְּצִדְקָתְךָ תוֹצִיא מִצָּרָה נַפְשִׁי
וּבְחַסְדְּךָ תַּצְמִית אֹיְבָי	וְהַאֲבַדְתָּ כָּל־צֹרֲרֵי נַפְשִׁי	כִּי אֲנִי עַבְדֶּךָ