READINGS: ONE MARTYR
| Easter Invitatory Antiphon
|
Easter Antiphon
|
צַר־וּמָצוֹק מְצָאוּנִי (הַלְלוּ יָהּ) — מִצְוֹתֶיךָ שַׁעֲשֻׁעָי (הַלְלוּ יָהּ)
| First Reading Lent | First Reading Easter |
2 Corinthians 4:7—5:8ἔχομεν
δὲ τὸν
θησαυρὸν τοῦτον
ἐν
ὀστρακίνοις
σκεύεσιν,
|
 or |  |
Augustine, Sermon 329. In natali martyrum
Per tam gloriosa sanctorum martyrum gesta, quibus ubique floret ecclesia, ipsis oculis nostris probamus quam uerum sit quod cantauimus, quia pretiosa in conspectu domini mors sanctorum eius: quando et in conspectu nostro pretiosa est, et in conspectu eius, pro cuius nomine facta est.
Sed pretium mortium istarum mors est unius. quantas mortes emit unus moriens, qui si non moreretur, granum frumenti non multiplicaretur? audistis uerba eius cum appropinquaret passioni, id est, cum nostrae appropinquaret redemptioni: nisi granum tritici cadens in terram mortuum fuerit, ipsum solum manet: si autem mortuum fuerit, multum fructum affert.
egit enim in cruce grande commercium; ibi solutus est sacculus pretii nostri: quando latus eius apertum est lancea percussoris, emanauit inde pretium totius orbis. empti sunt fideles et martyres: sed martyrum fides probata est; testis est sanguis. quod illis impensum est, reddiderunt, et impleuerunt quod ait sanctus ioannes: sicut christus pro nobis animam suam posuit, sic et nos debemus pro fratribus animas ponere.
et alibi dicitur: ad mensam magnam sedisti, diligenter considera quae apponuntur tibi, quoniam talia te oportet praeparare. mensa magna est, ubi epulae sunt ipse dominus mensae. nemo pascit conuiuas de se ipso: hoc facit dominus christus; ipse inuitator, ipse cibus et potus. agnouerunt ergo martyres quid comederent et biberent, ut talia redderent.
sed unde talia redderent, nisi ille daret unde redderent, qui prior impendit? unde et psalmus, ubi scriptum cantauimus, pretiosa in conspectu domini mors sanctorum eius, quid nobis commendat?
considerauit illic homo quanta accepit a deo; circumspexit quanta munera gratiae omnipotentis qui eum creauit, qui perditum quaesiuit, qui inuento ueniam dedit, qui pugnantem infirmis uiribus iuuit, qui se periclitanti non subtraxit, qui uincentem coronauit, qui praemium se ipsum dedit: considerauit haec omnia, et exclamauit, et dixit, quid retribuam domino pro omnibus quae retribuit mihi?... calicem salutaris accipiam.
quis est calix iste? calix passionis amarus et salubris: calix quem nisi prius biberet medicus, tangere timeret aegrotus. ipse est calix iste: agnoscimus in ore christi calicem istum dicentis, pater, si fieri potest, transeat a me calix iste...
de ipso calice dixerunt martyres, calicem salutaris accipiam, et nomen domini inuocabo. non ergo times ne ibi deficias? non, inquit. quare? quia nomen domini inuocabo. quomodo uincerent martyres, nisi ille in martyribus uinceret, qui dixit, gaudete, quoniam ego uici saeculum? imperator coelorum regebat mentem et linguam eorum, et per eos diabolum in terra superabat, et in coelo martyres coronabat. o beati qui sic biberunt calicem istum. finierunt dolores, et acceperunt honores. attendite ergo, charissimi: quod oculis non potestis, mente et animo cogitate, et uidete quia pretiosa in conspectu domini mors sanctorum eius.
or
Prayer
